|
15.05.2012 - Шеесетгодишен овчар од гостиварско Калиште цела ноќ се криел од волци кои го нападнале стадото што го напасувал
Го нападнале волци, се криел цела ноќ во шума и му снемало 60-тина овци од стадото. Ова е случката која шеесетгодишен овчар од гостиварско Калиште ја раскажал во полиција утрово, откако претходно го немало 24 часа и бил пријавен како исчезнат. Полицијата ја проверува приказната, дали навистина овчарот бил загрозен од глутница волци и зошто недостасува дел од стадото.
Според информациите од СВР Тетово, триесет и осумгодишниот сточар Спасен Т. од селото Печково вчера пријавил дека неговиот овчар ден пред тоа од рано наутро излегол да го напасува стадото во околната шума и не се вратил.
Подоцна од вкупно 263 овци биле пронајдени 200, а останатите ги немало. Сточарот успеал да стапи во контакт со неговиот овчар телефонски дури утрово. Тој му раскажал оти морал да се крие од волци кои се нафрлиле врз стадото.
Шеесетгодишниот овчар од Калиште немал никакви повреди, а од СВР Тетово соопштуваат дека разботат на расветлување на случката.
Љупка Антеска
|
|
