|
12.06.2012 - Сопствениците на кафулиња и дискотеки летово не треба да пуштаат прегласна музика во нивните објекти
Со започнувањето на летниот распуст, најголемиот број од кафулињата, отворените тераси и дискотеките во Тетово и Гостивар ќе бидат многу почесто посетувани од младите, посебно во доцните вечерни часови, кога и најчесто се организираат разно-разни забави и други видови дружења.
На ваквите забави неретко се пушта прегласна музика, со што најдиректно се вознемируваат граѓаните кои живеат во непосредна близина на угостителските објекти. Ова , посебно се однесува на објектите кои се сместени во приземјата на станбените згради, но и воопшто.
Секторот за внатрешни работи Тетово им укажува на сопствениците на кафулињата и дискотеките , меѓутоа и на сите други граѓани да се воздржат од пеење, користење музички инструметни, пуштање прегласна музика од радио и тв-апарати, музички системи или од друг вид врева во периодот помеѓу 15 и 18 и од 23 до 6 часот наутро.
За секое пријавено нарушување на мирот во овој период, кое непосредно ќе се утврди со употреба на адекватна опрема, односно со фонометар, ќе се изготви и поднесе барање за поведување на прекршочна постапка , додека глобата за овој вид прекршок изнесува од 200 до 500 евра во денарска противвредност.
Глобата за правно лице, пак, се движи од 500 до 1000 евра и плус 200 до 500 евра глоба за одговорното лице на правниот субјект.
Глоба од 500 до 800 евра ќе му се изрече на трговец-поединец кој врши угостителска дејност, а не преземе конкретни мерки да да го спречи нарушувањето на јавниот ред и мир во неговиот објект.
Секторот за внатрешни работи Тетово претстојново лето засилено ќе ги контролира угостителските објекти и секаде каде што ќе утврди нарушување на јавниот ред и мир соодветно ќе реагира.
Даниејла Петковска
|
|
