|
10.03.2010 - Тепачка на гостиварскиот пазар
Крвава тепачка на гостиварскиот пазар. Двајца продавачи, соседи по тезга се истепале заради простор за изложување на стоката. Едниот од пазарџите завршил во болница, со рани од нож по телото.
Според информациите од полицијата, инцидентот се случил вчера, на пазарен ден во Гостивар, околу 8 часот наутро, пред отварањето на пазарот.
40 годишниот М.Д. од Тетово кој на пазарот обично продавал верска литература и сувенири, истоварал производи пред една тезга. Продавач од гостиварското село Топлица му пришоил и набрзо почнале да се расправаат околу тоа кој каде да продава. Во расправијата со навреди и пцости си размениле и тупаници. Останатите тезгаџии успеале да ги разделат, но по 20-тина минути пазарџијата од Топлица се вратил со нож во раце и го нападнал соперникот. Успеал да го расече во левата стана на телото.
За среќа, ударите од ножот не биле длабоки и не предизвикале серизони последици. На повредениот продавач му била укажана лекарска помош во гостиварската болница по што бил пуштен дома.
Од полицијата информираа дека напаѓачот Ш.Ќ. бил приведен во Полициската станица во Гостивар и задржан на разговор. По целосно расветлување на поединостите против него ќе биде поднесена соодветна пријава.
Љупка Антеска
|
|
